ازاي تكتب الاهداف علي السنة الجديدة

1- اول حاجة لازم تعملها بعد ما تظبط قاعدة حلوة و حاجة تشربها .. هو انك تفكر ف اهدافك السنة اللي فاتت .. و حققت منها ايه و محققتش منها اية .. و اية الاسباب اللي منعتك انك تحقق اهدافك دي ,,

2- ابدأ قسم اهدافك ل Categories زي مثلاً اهداف شخصية ( ليها علاقة بشخصيتك ) اهداف مالية .. اهداف ف الشغل .. اهداف لصحتك ..
بس لازم قبل ما تفكر ف الهدف فكر ف نتيجتة عليك

3- فكرت ف كُل اهدافك ؟؟ كُل حاجة نفسك تحققها ؟؟ اكتب كُل الحاجات دي بقي ف ورقة .. و اعرف انة صعب ( بس مش مستحيل ) انك تحقق كل الاهداف دي ف نفس الوقت .. ف ابدأ رتب الاهداف دي حسب الاولوية .. يعني اية اكتر حاجة نفسك تحققها ف اقرب وقت .. بعد كدة اية بعدها و هكذا ... كدة انت معاك ورقة فيها اهدافك ( بالترتيب )

4- اتأكد ان كل هدف من الاهداف اللي كتبتها دي ممكن فعلاً انه يتحقق ( يعني مش مستحيل ) مينفعش تكتب من ضمن اهدافك انك تجيب تقدير عام امتياز وانت تقديرك السنين اللي فاتت مقبول ! دة كدة هدف مش منطقي ..
ابدأ بقي اتأكد ان كل اهدافك منطقية و ممكن تتحقق .. اتأكد ؟
جميل اوي .. كمل قراءة

5- ابدأ حط لكُل هدف Deadline بمعني انك مش هتفضل شغال السنة كلها مثلاً انك تخس 2 كيلو !!
انت ممكن تحقق الهدف دة اصلاً ف اسبوع ! عشان كدة لازم تحط لنفسك وقت معين تحقق فية الهدف دة .. عشان لو سبت الموضوع عايم ف الاغلب مش هتعرف تحقق حاجة ..

6- استخدم الموبايل او الكمبيوتر بتاعك ف انك تعمل زي نتيجة ( Calender ) و تحط فيها التاريخ اللي مينفعش يعدي غير وانت محقق الهدف دة

7- شجع نفسك دائماً مع كتابة كُل هدف انه مش صعب انك تحققة ..

8- اكتب قدام كُل هدف "مكافأة" هتجبها لنفسك لما تحققة .. الموضوع دة هيشجعك اكتر , و حاول تختار المكافأت دي علي اساس حاجات انت نفسك فيها و نفسك تجبها ( الموضوع مش مُقتصر علي الشوكولاتة بس يا جماعة )

9- متخفش .. شوفتوا منير لما قال متخليش حاجة توقفك فعلاً مفيش اي حاجة ف الدنيا تقدر توقفك من تحقيق هدفك ! خليك مؤمن بكدة جداَ ..

10- متسمعش لأي حد يقولك مش هتقدر ... و اعرف ان في فرق بين انك تتعب و انك تجيب اخرك كُل ما تحس انك مش قادر اسأل نفسك .. هو انا تعبت , ولا دة اخري فعلاً ؟؟